Muddat meN woh phir taazah mulaqaat ka aalam

Muddat meN woh phir taazah 

mulaqaat ka aalam

Khaamosh adaa'oN meN woh 

jazbaat kaaaalam

NaghmoN meN samoya hu'a 

woh raat ka aalam

woh 'itr meN Duube hu'e lamHaat 

ka aalam

Allah re woh shiddat-E-jazbaat 

ka aalam

kuchh kah ke woh bhuuli hu'i 

har baat ka aalam

Chhaya hu'a woh nashsha'-e-

Sahbah-e-muHabbat

jis taraH kisi rind-E-Kharaabaat 

kaa aalam

Woh saadgi-E-Husn, woh 

mehjuub-nigaahi

woh maHsharl-E-sad shukr-o-

shikayaat ka aalam

NazroN se woh m'asuum 

muHabbat ki tarawish

chehre pe woh mashkuuk 

Khayalat ka aalam

Be-shart-E-takalluf woh 

pazeeraa'ii-E-ulfat

be-qaid-E-tasanno' woh 

madaarat ka aalam

Eik eik nazar she'r-o-shabaab-o-

mae-o- naghma

eik eik adaa Husn-e-moHaakaat 

kaa aalam

Woh nazaroN hi nazaroN meN 

savaalaat ki duniya

woh aankhoN hi aankhoN meN javaabaat ka aalam

Aariz se Jhalakte hu'e shabnam 

ke do qatre

aankhoN se Chhalakta hu'a 

barsaat ka aalam

Naazuk se tarannum meN 

ishaarat ke daftar

halke se tabassum meN 

kinaayaat ka aalam

Paakizagi-e-'asmat-o-jazbaat 

ki duniya

doshizgi-e-Husn-e-Khayaalat 

ka aalam

Barham woh nizaam-e-dil-o-

duniya-e-tamanna

paiham wo shikashtoN meN 

futuHaat ka aalam

Woh 'ishq ki barbaadi-e-zindah 

ka muraqqa'

woh Husn ki paa'indah 

karaamaat ka aalam

Woh aariz-e-pur-nuur, woh 

kaif-e-nigah-e-shauq

jaise kih dam-e-subH munaajaat 

ka aalam

Woh jur'at-e-bebaak, woh shoKhi,

woh sharaarat

woh Husn-o-muHabbat ki 

masaavaat ka aalam

Thak jaane ke andaaz meN 

woh da'avat-e-jur'at

kho jaane ki suurat meN woh 

jazbaat ka aalam

Sharma'ii va lajaa'ii hu'ii woh 

Husn ki duniya

woh mehki hu'i, bahki hu'i 

raat ka aalam

Taa subH, woh tasdeeq-E-

mubaahat ke nazaare

taa shaam woh phir faKhr-o-

mabaahaat ka aalam

Aalam miri nazroN meN "Jigar"

 aur hi kuchh hai

aalam hai agarcheh wohi din-

raat ka aalam,,,