widget

Wednesday, 1 October 2014

Chaahat ke subH-o-shaam, muHabbat ke raat din


Chaahat ke subH-o-shaam, 
muHabbat ke raat din
"dil DhuuNDtaa hai phir wohi 
fursat ke raat din"

woh shauq-e-be.panah meN 
alfaaz ki talaash
izhaar ki zubaan meN luknat 
ke raat din

woh ibtidaa-e-'ishq , woh 
aaGhaaz-e-shaa'irii
woh dasht-e-jaaN meN pehli 
musaafat ke raat din

saudaa-e-Aazari meN 
hawaa-e-sanamgarii
woh but- parastiyoN meN 
'ibaadat ke raat din

ruu-e-nigaraaN-o-chashm-e-
GhazaloN ke tazkire
gaisu-e-yaar-o-Harf-o-
Hikaayat ke raat din

naakardah-kaariyoN pe 
bhi bad-naamiyoN ka sho'r
aKhtar shumariyoN pe bhi 
tuhmat ke raat din

Meer-o-Anees-o-Ghalib-o-
Iqbal se alag
Raashid, Nadeem, Faiz se 
raGhbat ke raat din

Shelly ka seHr, Keats kaa 
dukh, Byron ki dhaj
inn kaafiraan-e-'ishq se nisbat 
ke raat din

jaise mae-e-suKhan se suraahi 
bharii hu'ii
zor-e-bayaan-e-Husn-e-
tabee'at ke raat din

rakh kar kitaab-e-aql ko 
nisiyaaN ke taaq par
woh aashiqii meN dil ki 
Hukuumat ke raat din

har roz, roz-e-abr thaa, 
har raat chaand raat
azaad zindagi thii, faraaGhat 
ke raat din

ik raazdaar-e-Khaas ko har 
waqt DhuuNDna
be-a'itbaariyoN meN zaruurat 
ke raat din

woh har kisi se apna hi 
aHwaal puuchhnaa
apne se bhi tajaahul-e-Ghaflat 
ke raat din

ik dushman-e-wafaa ko 
bhulaane ke waaste
chaarah-garooN ki pand-o-
naseeHat ke raat din

pehle bhi jaaN-gusil thay, 
magar iss qadar nah thay
ik shehr-e-be.amaaN meN 
sukuunat ke raat din

phir yeh hu'a kih shewah-e-
dil tark kar diyaa
aur taj diye thay ham ne 
muHabbat ke raat din

fikr-e-mu'aash, shehr- 
badar kar gayii hameN
phir ham thay aur qalam 
ki mashaqqat ke raat din

phirte thay Mir Khwaar ko'ii
puuchhtaa nah thaa
qismat meN jab talak thay 
qanaa'at ke raat din

nau-waaridaan-e-shehr-e-
tamanna ko kyaa Khabar
ham saakinaan-e-kuu-e-
malaamat ke raat din