Main Apne Ru-Ba-Ru Hoon
Aur Kuch Hairat-Zada Hoon
Main
Na Janey Aks Hoon, Chehra
Hoon Ya Phir Aaiena Hoon Main
Meri Majbooriyaan Dekho k
Yakjaai k Paikar Mein
Kisi Bikhrey Huwe Ehsaas Mein
Simta Huwa Hoon Main
Meray Andar k Mausam Hi Mujhe
Tameer Karte Hain
Kabhi Sairaab Hota Hoon, Kabhi
Sehra-Numa Hoon Main
Jo Hai Wo Kiyon Hai Aakhir, Jo
Nahi Hai Kiyon Nahi Hai Wo?
Isi Guthi Ko Suljhaney Mein Hi
Uljha Huwa Hoon Main
Ye Baat Ab Kaise Samjhaaon Main
In Masoom Jharnon Ko?
Guzar Kar Kin Maraahil Se
Samandar Mein Mila Hoon Main
Main Jab Khud ko Huwa Haasil
To Ye Uqda Khula Mujh Par
Koi Manzil Nahi Hoon, Ik Safar ka
Marhala Hoon Main
Tabhi To Main Hoon Motbar Apni
Nigaahon Mein
Manaazir ko Barri Sanjeedagi Se
Sochta Hoon Main...
No comments:
Post a Comment